De Afang
Ich grieß Eich er Leit un hoff iwwer die Kerb lossen`er eier Probleme dehäm.
Denn ohne Probleme is es Lewe viel schäner un a bequem.
Iwwer BSE oder die Maul-und Klauenseuche,
hän`er schun genunk gehert, ich her Eich do howe keuche.
Die negschde Daa wollen`mer liwer feiere un lache,
drum loss`ens a Disjohr wieder richdisch krache.
Bevor ich jetzt afang, muß ich erschd emol vum gute Kerwewoi in die Kehl nei losse.
Un wenn er wollen, kenn er amol uff die Kerb astoße.
Aktion "Trink dir die Männer einfach schön"
In Gellem wohnt seit langem Ääner,
des war schunn immer so en Schääner.
Sieht aus wie David Cassidy,
do geh´n die Mädscher in die Knie.
Deletscht hot er soo rumgespunne,
mer sollten doch mol niwwerkumme.
E Bikertreffe wär net schlecht,
des kam zwää Fraue grade recht.
Modorradzwang war net vorgebb,
die Susi hot sich uffgeknebbt,
die Karin hot sich hochtoupiert,
sinn dann no Gellem emmigriert.
Mim Hapke hänn se sich getroffe,
noch annre Kerl kummen geloffe.
Große, Dicke, Dinne, Klääne,
awwer leider kää so schääne.
"Alleweil," die Karin saad,
"der Owend iss doch viel zu schaad,
der Klääne iss gar net so klää,
mer saufen uns die Männer schää!"
Bei 0,5 werd de Große klänner,
bei 0,8 de Dicke schmäler,
bei 1,5 de Dinne fetter,
gleicht faschd em Arnold Schwarzenegger.
Damit der Klääne ach noch werd,
hot mer paar Biercher noogezerrt.
Noch ääner werd ennei geschitt,
vielleicht gäbts heit noch en Brad Pitt.
Wer´s net schää genug krie kann,
der werd merke irgendwann:
dick bleibt dick un klää bleibt klää,
die Männer sinn zum Kotze schää!
Die Karin halt noch ganz gut mit,
die Hochfrisur is ach noch schick.
Drei-Wetter-Taft unn 8x4,
Immodium und der Tag ist dir.
Degeege bei de Susi Kranz,
verblasst de uffgetraane Glanz.
De "Schönheitstrank" war net so g´sund,
es Umfeld werd so langsam rund.
Die Mannsleit hänn gut mitgesoffe,
unn mancher is ins Klo geloffe.
Die annre hodds ins Freie verschlaa,
unn pinkeln an e Audo draa.
Die Schdunn is speet, de Dach is frieh,
die Susi is endgildisch hieh.
Ihr isses hääs, sie braucht jetzt kalt,
find an derm Audo endlich Halt.
Des kiehle Blech dud richdisch gut,
die Nachtluft sie beleben tut,
uff ämol denkt sie "Irgendwo -
riechts wie so aldes Dixie-Klo".
Zum Dunnerkeil, trotz viel Bemüh´n,
werd sie oliv- bis tannengrün.
Die Übelkeit nimmt ihren Lauf,
in Gellem brecht de ätna aus.
Sanitäter missen her!!!
Zum Glick gebt´s die Familie Bär.
Unn wie mer schbeeder dann erfahrt,
hännse die Susi uffgebahrt.
Am nägschde Daach, im Kopp ganz doof,
erwacht se dann im Kloschderhof.
Ob dick, ob groß, ob dinn, ob klää,
die Männer sinn zum Kotze schää!!
Uff die SCHÖN-TRINK-AKTIONE vun de Fraue,
wer ich mer jetzt noch en Schorle eibaue.
Der alte Schwede
Er war früher bei uns im Dorf bekannt,
un is ach vun Wertschaft zu Wertschaft gerannt.
Er is dann vun hier fortgezoh um die Meere zu umsegle,
un wohnt seit dem in Schwede.
An mancher Kerwe war er dann bei uns im Dorf des war ach klar,
mol mit un ach mol ohne Fraa.
Jetzt hot ihn ach ereilt des Alter, mit Bootche fahre is jetzt Ende
der alte Schwede is in Rente.
Vor korzem hot er sich mol wieder getraut
un e Zimmer gemiet bei de Waltraud.
Un grad am Brunne dun en Haufe Witwe wohne
Die wollten sich den Kerl schon klone.
Bei de Waltraud sollt er an die Heizung kloppe
Die Alice sagt, wenn ich peiff kannschte riwwer robbe.
Der Schwede dut nur gaffe,
nä, uff emol kann ich des net schaffe.
Die Waltraud hot dann mit Bedacht
sofort en neie Plan gemacht.
Ich nehm den an de grade Dache
mit de Alice derf er sich an de ungerade plache.
Die Christa hot des glei geschnallt
un schon hots quer durchs Dorf gehallt:
Alice, die hot dich neigelegt im nu
die hot den ein Dach mehr wie Du.
Der Schwede hot sich dann umgeblickt
un in annere Regione mol verdrückt.
Er hot die alle zwä emol beglickt,
awwer nur zum Kaffee, ganz geschickt.
Un die Moral vun der Geschicht,
streit Dich um einen Schweden nicht.
Mundschenk mach des Glas mol voll
bevor ich an de Brunne troll.
Die Harleyweiber I
Frieher war´n uff em Feld nur die Wildschweinsaue,
heit trefft mer nur noch die Mopedrollerrockerfraue.
Alex un Alex im Doppelpacke,
alle zwä blond un en klene Macke.
Die änd derf fahre un die anner hot´s gemacht.
Er kännt´s eich jo vorstelle, ruckzuck hot´se gekracht.
Des Moped wollt grad un die Stroß war e bisje krumm un ferdisch es Gegacker,
un schun liegen´se iwwerzwerch beim Trautmann im Acker.
Dem Moped is nix passiert,
nur die zwä Mäd hän sich ganz schä rassiert.
Beide Alex mit bludische Knie un am Kopf e paar Bause,
dunse trotzdem beide mit em Harleymoped in die Heimat brause.
Uff so viel Stunt´s un dene ere bludische Knie,
hab ich jetzt Dorschd wie e Stick Vieh.
A Trautmann`s Adolf sein 90. Geburtstag
Es war zwää Daa vor de Hexenacht,
do hot`s im Dorf ferchderlich gekracht.
Es hot gebummst wie doll,
zwä Opel haden sich in de Dorfstroß in de Woll.
Der äne der is net gefahre.
Mer will jo ab un zu Sprit spare.
Es War en Corsa ganz in rot.
Jetzt leid er uff em Schrott un is dot.
Es anere Audo faschd nachelnei,
is hinne druff gelenkt worre, des war net fei.
En silberne Vectra, mit em Seppel am Steuer,
rast durch`s Dorf wie e Kamikazeugeheuer.
Vum Traudel Senior seim Geburtstag ware kumme,
un hot sich mit`em Marmor-Richard noch die Sporthall vorgenumme.
Doch gegeüber vum Ackermann seiner umgebaute Scheier,
do wird`s fer de Hütche-Seppel plötzlich deier.
En Krach, en Bumms un schun steht die Kischd.
Er hot`em Reno sei Corsa`che voll verwischd.
Er denkt, mein Führerschei war schun zwää mol fort.
Ich schleich mich schnell an en anere Ort.
Awer de Rückwärtsgang krieht er nimmi gebacke
un dut sich halwer in die Hose kacke.
Er schiebt den Corsa als weiter an die Mauer.
Des halt kä Audo aus uff die Dauer.
So lost er dann ziemlich stralli sein Vectra stehe,
um uff alle viere nach Hause zu gehe.
Dehäm krabbelt er zum Irmche ins Bett.
Daß der so frieh häm kummt find die ganz nett.
Awer morgens um vier iss`es dann vorbei,
do klingelt äner an de Hausder wie die Polizei.
Es waren ach die Herren in grün
Un wollten mo nom Seppel siehn.
Die Getränke waren noch net verdaut
Un`em Seppel sei Nachtruh war a noch versaut.
E Blutprob wollden die, es is net zum Lache,
vielleicht waren`se druff aus, deraus er Betriebsfeschd zu mache.
De Lappe wär futsch mänt die Polizei,
un a vorbei mit de Hütchetourfahrerei.
Seppel laaf jetzt in`s Hallche zu Opa un Oma
Dort falls net uff, wenn de saufchd bis ins Koma.
Uff de Seppel, den Schrott, die Hütcher un die Bullerei
Schwart ich mer schnell en Schluck Kerwewoi enei.
Oder im Dorf soll mer net besoffe Audo fahre!
De Massage-Günni
Er g´heert zum Dorf wie´m Edeka sein Krempel,
de Günni un sein Massagetempel.
Deswe lossd er sich´s ach net nemme,
uff jedes Buscher Feschd zu renne.
So ware a an de Fassnachd in de Hall,
un wie ner glei heern, hoddsem do gut g´fall.
Die Iris, sei damalischi Freundin, konnt leider net mit,
drum hodder glei aageruf beim Thomas Schmitt.
"Heer, Achmed, hosch heit owend Zeit?
Mer trinken uns mol rischdisch breit!"
De Achmed saad zu, des war jo klar,
de Günni froot noch: "Was zieht mern do aah?"
Sie hänn beschloss, sich net zu koschdümiere,
mer kännd sich schließlich aach so gut amüsiere.
Die zwää sich getarnt, wie immer als Spritti,
de Massagegünni un sein Kumpel, de Schmitti.
Zur Einstimmung schnell dehääm noch e Bier,
bis se drowwe warn, warns dann vier,
um 20.11 hännse dann endlich ern Platz eigenumme,
un es folgende Programm a ganz schää lusdisch g´funne.
IN DER PAUSE KAM DANN DIE WENDE!!!
De Günni fand mer nur noch an de Schenke.
Un bis die Vorstellung war vorbei,
hat er 40 Schorle + 3.
Ab dann hodder massiert, wie en Wildaa,
so griffische Fraue wies Susi un´s Hilda.
Wann´s Iris debei gewess sei jetzischi Fraa,
die heddem beschdimmd die Zääh neigschlaa.
Die Massagegriffel warn werklich iwwerall,
des war net de Hilda un de Susi ehrn Fall.
Je mehr die Mäd sich mädchenhaft benumme,
umso hefdischer in Fahrt isser kumme.
Zwischedrinn hännse als emol Land gewunne,
de Günni hod mer dann an de Bar werre gefunne.
Frisch gestärkt und voller Manneskraft,
er sich glei widder an de Fraue zu schaffe macht.
Irgendwann hadder die Orientierung total verlohr´,
un is in de Kneip´ rum wie nimmi ganz klor (mimm wallende Hoohr).
Endlich is dann de Zeitpunkt fers Hämgeh kumm,
die Acki un´s Susi hänn sich ihm dann aagenumm.
Mit vereinter Kraft hännsen in ihr Mitte verfracht,
damit er uffem Weg ins Dorf net zammekracht.
Jeder wollt dehäm in sei Hausdeer enei,
doch do hot mer gemerkt: "De Günni is jo a noch debei."
Die Frage stellt sich: "Was mache mer dann?
Geh mer eschd mol noch zum Ackermann!"
Beime Biersche is mer dann druff kumme,
de Hapke Jürgen hädden jo mitgenumme.
Der hod sich nämlich die Nacht beim Karl eiquartiert,
un hätt uff derm Weg ach de Günni hämgfiert.
Soweit isses awwer leider net kumm,
de Günni is stur mit de Mäd annerschrum.
Am Scheere Eck ware immer noch ihrn Wegbegleiter,
un do hänn die Mäd gsaad: "So geht des net weider!"
Wieder Retour Richtung Dorfausgang,
hännsen dann g´stelld in de Praxishausgang.
Wer määnt do hodd die G´schicht ihr End,
der errt sich do hodder nochmol ausgepackt sei Händ!
Mit Mieh un Not hännsen uff die Massage-Britsch geleht,
doch dodriwwer hott der sich ach noch g´frääd.
"Endlich hänns die zwää kabiert,
jetzt werr ich endlich aach massiert!"
Völlisch entspannt schmilzt er dahin,
doch die Mäd hänn anneres im Sinn!
Die Acki sucht un find imme Schrank,
das altbewährte Deuserband.
"Susi halden ich schnallen feschd!"
Die Idee vun de Acki war werklich die beschd.
Die Tat war vollbracht er konnt sich net weere,
die zwää Mäd konnten de Praxis de Rigge zukehre.
Gefesseld hodder do geleh,
GÜNNI, WAS WAR DE OWEND SO SCHää!!!
Doch no so´me Owend folgt ach en Morje,
un dodemit ganz annre Sorje.
"Wie kännt ich mich dann befreie vun derm Band?"
doch dann kummd de Vadder un geht em zur Hand.
Wie´s weider gange is, kann er eich selwer saa,
wanner demnägschd zurick is aus Auschdralia!!!
Uff de Günni un sei Graberei,
massier´n mer uns jetzt ener nei!"
Alles hat ein Ende nur die Wurst hat zwei!"
Des trefft zu aus jeder Sicht.
Denn mich hot`s jetzt a mit de Kerweredd erwischt.
Awer bleiben noch do un dun net glei fortlaafe.
Die Kerweredd ken`er nämlich kaafe.
Un außerdem kummt noch es Beschde die Münchhause.
Un do losse mer noch emol richdisch die Kuh sause.
Awer ich bin schun heiser un muß mei Kehl mol öle.
Des dauert net lang, des langt noch fer`en Kerwesproch zu gröle.