De Afang
Servus er Leit, ich grieß eich ganz herzlich,
zu unserer Kerweredd- Ausgab Nr. 48.
Nix will ich eich erzähle von Nitrofen, Acrylamid oder MPA- Hormone,
liewer e paar Geschichte vun de Buscher Eiwohner betohne.
Vun denne, ihr Leit, do gebs paar Granade,
denne is net emol ihr Ehre zu Schade.
Die gebben Vollgas es ganze Johr,
mir Hkk´ler, mer finden des glor.
Do hemmer wenigschdens was zu berichte,
unn missen net, so wie die Matzeberjer, was zusamme dichte.
Ach iwwer bestimmte Personen misse mer nix mehr schreibe,
ganz ehrlich, die dun jo es ganze Johr iwwertreibe.
Iwwer de Baby- Boom unn sunschdige Gelage in Hertlingshause,
verlierhn mer kä Wort mehr, dun efach weiter mause.
Hertlingshause braucht Nochwuchs, Zuchthengste sinn vorhande,
es fehlen nur die Fraue, was fer e Schande!
Jetzt langsd fer de Afang, ens will ich awwer noch erwähne,
bevors eich langweilisch werd unn ihr dun afange zu gähne.
Vize- Weldmeschder simmer verdient geworre,
do druff du ich mer jetzt de Kerwewoi schnorre.
Uff de Ruuuuudi, die Elf unn die Buscher dun mer jetzt ener hebe,
damit mei Zung nimmi dud am Gaume klebe.Prost
De Gulaschsuppe- Fetischisd
Letschdes Johr an de Maut, do hot sich was zugetrage,
des zu erzähle, des derf mer sich garnet wage.
Mer wollten´s eich zuerschd garnet erzähle,
doch es Claudia mähnt, mer sollten´s erwähne.
Unser Jörg, es klä Werner´ sche,
hot sich zugeknallt, obbe sei klä Kämmer´sche.
Er hot nimmi viel gesehe und konnt ach kaum noch spreche,
kerz gesat: er war knapp vorm erbreche.
Um des Elend schnell zu beende,
kummt die Heilsarmee, unn dut ä Gulaschsupp spende.
Die Kanon uffgebaut, die Supp häß gemacht,
damit unser Jörg ach noch übersteht die nägschd Schlacht.
Er war ach de erschde, wu sich die Supp hot geholt,
iwwerrandvoll de Deller, ä Bild wie gemohlt.
De Deller stellt er ab, uff de Bank, direkt am Brunne,
Jörg: "stell nix ab, schunnschd kriegschd genumme".
In de Mähnung, die Supp sei gewerzisch unn scharf,
steht er vorm Mundschenk unn blöckt wie ä Schaf:
"Ich hab dorschd, geb mer bitte was zu trinke,
sunschd zieh ich mei Schuh aus unn du dich erstinke!
De Mundschenk is heit garnet so geizisch,
unn gebt dem a Flasch Wei von 1938.
De Jörg is befriedischd, gönnt sich gleich mol än Schluck,
unn setzt sich gemietlich, direkt in die Supp!!
Tosender Beifall, gehässisches Lache,
Claudia krakeelt: "was machst dann du fer Sache!?"
"Ich bin doch so klein, mein Herz ist so rein,
mein Arsch wollt doch bloß in die Gulaschsupp hinein!
"Lieber Jörg losst der emol sage:
"Die Supp iss zum esse do, unn net zum bade!!"
Uff de Jörg, die Supp und die, die wu hennse gegesse,
hät ich faschd mei Kerwe- Woi vergesse!
Prost
Hellbeerstorze auf großer Fahrt
Diesjohr im Mai, do is was bassiert,
die Hellbeerstorze sin in de Schwarzwald emigriert.
Beim Schagges, do hennse sich formiert,
unn sin zamme in de Bus nei marschiert.
Beim Stopp vor de Noll´ sche Metzgerei,
Esse unn "Trinke", es muß jo alles enei.
De Schaffner Willi peift, de Bus kummt ins bewesche,
selbschd beim Tippi dud sich was resche.
Unnerwegs wird viel gebabbelt, gesunge unn gelacht,
dodebei hät sich faschd de Seppel in die Hosse gemacht.
Bei soviel Stimmung, kriegt mer e druckenie Kehl,
jetzt schnell uffen Raschdplatz, des wär gud fer die Seel.
De Busfahrer bremst, weil de Reinhard hot sich ins Lenkrad verbisse,
"Halt sofort a, ich muß emol Pisse!"
Den Stopp nutzense ach glei als Gelegenheit zur Paus,
unn Springen alle dorschdisch aussem Bus e naus.
De Gerhard springt em Karl an de Krage:
"mach die Busklapp uff, sunschd muß ich dich erschlage,
ich hab dorschd, unn will jetzt e Bier,
unn wende net machschd, dann wer ich zum Tier!"
De Karl steht do, mit zittrische Händ,
eigendlich garnet so, wie mern so kennt.
Hoffentlich basst de Schlissel unn die Klapp dud nett klemme,
sunschd dunse mich iwwer de Raschdplatz kemme.
De Schlissel basst, die Fräd is groß,
was sieht mer zuerschd: e Worschdedooß!
Unn hinne draa is ach nur noch Freß,
die henn ganz kla de Suff vergeß!
"Wie kammer so doll sei, ihr Voll-Idiode,
ei soviel Blädheit, die kert verbode!"
De Gerhard tickt jetzt völlisch aus,
unn de Karl nemmt vorsichdisch Reiß aus.
Aus leider Verzweiflung unn völlisch besesse,
wird alles was debei is, aus Fruschd uffgefresse.
Un wie mer die Buscher so kennt,
wird iwwerhaupt garnix verschwend.
Denn dorschdisch sinnse immer noch ä bisje,
de Gerhard wird grad zum Oma Lissje.
Er holt jetzt sei Schoppeglas herbei,
unn fillt ver zum saufe, es Gurgewasser nei.
Wieder geht’s in de Calwer Raum,
de Gerhard hot jetzt vorm Maul schunn Schaum.
Die annere siehn net besser aus,
a net die Fraa vum Volger Klaus.
Dort agekumm wird endlich Alkohol presentiert,
dank de Irma die hots per Handy organisiert.
De Tippi unn de Schagges, die sinn sofort voll,
jetzt wird de Ausflug doch noch Toll.
Bevor ich do jetzt wieder du erzähle,
muß ich mer erschdmol äner neiquäle.
Sunschd geht mers wie denne Vollidiode,
unn mei Zung dut sich vor Druggeheit dodal verknoode.
Proschd
Frisch gestärkt jetzt wird geloffe!
Bad Tainach isses Ziel wollmer doch hoffe!
Awwer bevor de Schagges geht uff die Knie,
duden die Evi liewer durch die Pampa zieh.
Am Ziel agekumme, erspäht er 2 geile Gäule,
die Reiterinne, sinn noch geilere Keule.
Er bremsdse aus, unn setzt sich glei in Pose,
unn als Fuddergeld schmeißder ne 2 Euro in die Dose.
Nohm Esse versucht er sich als Trummler unn Dirigent,
die Irma hädd faschd vor lache geflennt.
Noch dem Ufftritt iss mit de Schlachterei vorbei,
er hot jetzt en Dauerufftrag bekumm, vunde Bloserei.
Kerz noo de Zehne gings endlich nach Hause,
e paar wollden schloofe, die annere mause.
De harde Kern is noch mit nei zum Schagg dela Worschd,
hänn weider gesoffe a iwwer de Dorschd!
Die Pergula ruft de Gerhard will Häm,
de Kurti geht mit die Creme dela Creme.
De Reinhard folgt´ne kerz denoch,
der muß nämmlisch noch emol uff´s Klo.
No 3 Flasche Sekt, fangt de Schädel a zu brumme,
De Reinhard macht sich Häm, unn dud debei es Hellbeer-Lied summe.
Am Zaun agekumme, sucht er es Gardedoor ganz fleisisch,
unn des Nachts, um ä Uhr dreisisch.
Gefunne hodders net so richdisch,
iwwer de Zaun macht er sich flischdisch.
Awwer hänge bleibt der, mit seine MEGA-Glogge,
unn dud mit em Match uff de Wiss frologge.
"Hilfe, Hilfe, Evi kumm runner,
sunschd geh ich do im Schlamm noch unner!"
Käner herts, im Mastch leit de Wasserwerksleider,
ach was war der Daach so heider!
Bevor de Wasser- Rößel im Matsch dud versinke,
du ich jetzt liewer nochmol am Schorle trinke.
Proschd
Einmal Tanken, Bitte!
Die Helga unn die Irma, die zwä Wellness- Tante,
wollten ins Salinarium, um Gesundheit zu tanke.
Uffem Weg noch Derkem, mer soll´s net glaabe,
war die Bus- Tanknodel faschd schunn am absterbe.
Schnell emol noch Hettrum zum Lick,
voll tanke, unn dann noch Derkem ins Wellness- Glick.
Unnerwegs wern noch Blume geflickt,
des gehehrt dezu, zum Schönheits- Tick!
Beim "Teuro- Tank Lick" agekumme,
wird ach schunn die Zapfpischdol in die Hand genumme.
Ab in de Tank, de Riegel zurick,
jetzt fräht sich ach die Tanknodel, was fer ä Glick!
Doch vor lauter kraakele unn schnattere,
unn dem laute Tankstelle rattere,
hähren die zwä net, das die Bump net läuft,
unn de Tank nur ä paar Troppe säuft.
Noch zwä Minute denkt die Frau Schagges,
des mißt jetzt reiche mit dem Audo- Schnappes.
Zapphahn raus, druff de Deckel,
mit Kart bezahlt, her mittem Zettel.
De Kassierer gucktse ganz verdutzt a,
ja, henn die ach nix mehr in bar?
Die henn doch ä riese Metzgerei,
die Worschd von denne is doch de letzschde Schrei!
Er denkt sich nur, loß die emol weiter fahre,
weit kummense net, des kann ich eich sare.
Ab in de Bus, die Tankuhr uff Null gestellt,
mer henn doch um 3 unser Saunagang bestellt.
Mit 180 noch Derkem über die Landstroß,
hoffentlich halt de Worschdbus bloß!
Unnerwegs wern schunn die Kläder vum Leib gerisse,
Zeit spare, ist die oberste Primisse!
10 vor drei, in Derkem agekumme,
lossen die zwä sich noch schnell än Drink bekumme.
Rei in die Sauna, aussem Bikini raus,
zwä Geschäftsfraue leben in Saus unn Praus.
Noch de Sauna gehnse noch ä bisje schwimme,
jetzt kenntense sogar de Himalaja erklimme.
Doch jetzt werds Zeit, mer missen weiter,
mer kaafen uns in Mannem noch ä paar schene Sommerkleider!
Raus aussem Wasser, rei in die Klamotte,
net vergesse, aziehe die Socke.
Rei in de Bus, kaum ageschnallt,
hot die Irma en schunn widder uff 160 hoch geknallt!
Doch Mitte uff de Stroß, es Busje ausgeht,
die Irma noch schnell an sämtliche Knöppscher dreht.
Doch die Fraa Schagges, schlau wie se iss,
ruft ihrn Markus a, der wäs ach klei wu des iss.
De Markus kummt unn setzt sich in de Bus enei,
unn denkt sich glei, so bescheiert kann mer net sei.
Er dreht de Schlüssel um unn guckt glei uff die Nodle,
unn fangt dann kräftisch a zu jodle.
"Des iss doch nett meglich, des kann doch net sei,
ich glaab, jetzt iss alles vorbei?
De Tank iss leer, die Nodel hängt noch unne,
henn ihr unnerwegs kä Tankstell gefunne?"
Sei Mudder will erkläre, doch de Markus hot kä Zeit,
setzt sich schnell wieder ins Audo unn schreit:
"ich fahr jetzt an die nächschd Tankstell unn hol eich ä bisje Sprit,
unn dann nemm ich de Bus widder mit".
Die Irma krakeelt, des kannschde doch net mache,
mer brauchen doch noch paar schene Summer- Sache!
Nix do, schelld der, des iss mir jetzt worschd,
ab unn zu hot de Bus ach emol dorschd!
Fazit:
Ihr zwä süße Wellness- Biene,
henn ihr kä Auto, dann benutzt die Schiene!
Lehrer beantragt DIXI-Klo
Do gibt’s en Lehrer, der is jedem bekannt,
mit me grüne Auto fahrt der als durchs Land.
Ämol, korz noch seinem Arbeitsende,
saust er wieder durchs Gelände.
Uffem Weg im Leininger Tal fangts uff ämol an zu reisse,
Un er muß ganz plötzlich sch....lucke!
Er petzt die Backe zusamme, tut sich schwer,
un trotzdem passiertem des Malleur.
Er beisst vor Fruscht ball in de Lenker,
dodebei macht des Auto ach en Schlenker.
Des Auto triftet uff die Gegespur,
wie des macht de Schumi nur.
Do kummt uff ämol - ach du Schreck,
des Schmittche mit seim Golf um die Eck.
Des wird eng dut sich de Lehrer denke,
un versucht uff die anner Seit zu lenke.
Es dut en Schlag, die Fetze fliegen,
wer dut jetzt wen besiegen?
Der Golf steht lädiert am Stroßerand,
un de Lehrer verschwindet unerkannt.
Doch im Auto hinnedrah hot äner gsat,
des war en ältre Mann mit Bart.
En ältre Mann mit Bart, ä grünes Auto do war klar,
wer do wu zu suche war.
Dehäm im Bad butzt er sich grad unner rieselnde Wassertrobbe,
als die Sheriffs an soi Hausdeer kloppe.
Soll ich saa des Auto is geklaut,
oder beruf ich mich uff en Black out?
Awwer des Auto steht jo do,
ich sag halt "ich mußt emol uffs Klo".
Mir beantragen jetzt, es is vielleicht besser so,
uff der Streck im Tal en Parkplatz mit me Dixi-Klo!
Damit mir net des gleiche bassiert do howwe,
Muß ich mol an dem Schoppe robbe,
Un hoff des dut e bissel stoppe!!
De verlorene Sohn
Wanns Wedder scheiße is wie nie,
Unn Rheuma schmerzt em in de Knie,
im Kobb vumm viele Rege ganz merb,
dann wees mer, es is Matzeberjer Kerb.
Jedoch dodriwwer will ich garnet schelde,
die do drowwe sinn wahre Kerwehelde.
E Bombefeschd hännse uff die Bäh gestellt,
was manchem Buscher gut gefällt.
Am Kerwesunndaach mit Kind un Fraa,
gehnse nuff, die 2 vunn de AH.
Die Lotte un de Alex begleiden ihrn Hoppel,
de Hannes un die Brigitte erscheinen im Doppel.
Mit guudem Wille un viel Familiesinn,
gehen dann die Stunne so langsam dahin.
Doch dann is ferdisch, die Mäd gehen nach Hause,
ähns steht emol feschd heit is nix mit Mause!
Newedraa duds Karusell Non-Stop laafe,
awwer die 2 gehn unbeirrt weider Wääze kaafe.
Während sich no lange Stunne de Bart schunn stobbelt,
de Hoppel mit seim Hannes an die Bar noch hobbelt.
Sie deeden jo gern noch länger no de Mädscher gaffe,
awwer es is ball Mondach un die missen jo schaffe.
Die Schorle- un Frauewelt hodd awwer viel Macht,
un fesseldse feschd bis dief in die Nachd.
Irgendwann wern se dann doch noch vernünfdisch,
un saan: "Wammer jetzt gehn, wär sicher ganz günsdisch."
Un wie se dann hämkumm sinn wääs kähner so genau,
doch ähns steht feschd die warn blauer wie blau.
Awwer ebbes muß ich eich jetzt noch berichde:
de Hobbel vergaß sogar sei Vadderpflichde,
ohne sein Buh´ is er dehäm gelandet,
die Lotte hot sich zur Furie verwandelt.
Wo issen mei Kind, du Suffkobb, du bleeder?"
"Den hawwisch vergesse der kummd hald später!"
No zirka ähner Stunn war de Alexander dann kumme,
Un es Volger-Simons hadden ihr Familieidylle widder gfunne.
Wies em Hannes ergange is, will ich garnet erkläre,
ich will mer jetzt nur noch ähner neimähre
PROST!!!
De Schluß
So, des wars, die Vorhang geht runter,
ich hoff eich geht’s gut, sinner noch munder?
Mer hoffen, es hot eich bei uns gefalle,
awwer noch is net Schluß, jetzt losse mer noch emol richtig die Korke Knalle.
Jetzt kummen unsere Münchhausener, wie gewohnt am Ende,
mer wolle jo net ä paar Geschicht´scher verschwende.
Ä paar sinn debei, Ok, die sinn ä bisje iwwertribbe,
awwer gebt net mir die Schuld, ich habse jo net geschriwwe.
Fer nächsdes Johr, dud bitte net mit Geschichte spare,
stellt viel a, unn loßt es uns erfahre.
Die Kerweredd kennt ihr do unne kaafe,
bei denne schäne Mäd, die do rum laafe.
Mer wünschen eich noch viel Spaß uff unser Kerbe,
unn ich drink noch Schluck, bevor mei Stimm dud endgüldisch absterbe.
Liewer Mundschenk loß dich nett lumpe,
geb mer noch en großen Schluck, awwer bitte net den kläne Stumpe.
Prost