De Afang
Mahlzeit ihr Leit, ihr große un kläne,
hehrn jetzt aber uff, do unne zu gähne.
Denn ich muß eich sache ihr liewe Leit,
es is mol werre Buscher Kerwezeit.
So, jetzt fang ich a, e bisje zu dichte,
un über e paar vun eich, e Geschicht zu berichte.
Aber nix brauch ich eich vun de Matzeberjer erzähle,
dodemit will ich eich überhaupt nimmi quäle.
Denn die do obbe, die lernen´s nimmer,
die klauen sogar unser Maut, es wird immer schlimmer!
Ach vun wu annerschd brauche mer net zu klaue,
es gebt genug Hertlingsheiser, die Scheiße baue.
Un außerdem gebts ach noch genug Randgeschichde,
wu ich kann eich drüber berichte.
ich hoff eich gefallt´s, ich wünsch eich viel Spaß,
jetzt lege mer los, jetzt gebbe mer Gas.
Mein liewer Mundschenk, welcher Woi hoschd fer mich?
Ich hoff fer dich, des is kä egliches Gemisch!
Uff die Buscher, unser Kerb un es Lebe,
uff die Sunn un de Woi vun de Rebe,
knall ich mer jetzt dodal übertriebe,
de Kerwewoi zwische die Rippe!
Proschd
Die Riese-Fleddermaus
In Busch is selden was los,
awer wann,des wird g´feiert ganz groß.
Vor korzem war "Power beim Bauer",
do hän einische gelä uff de Lauer.
Samschdachs Nacht, de Muffel hot sein Dienschd beend,
un sisch g`schwind em Hämweg zu g´wend.
Mit de Alice un em Goldi laaft er die Hauptstroß nunner,
un dess a noch grad, was fer Wunner!!!!!
De Muffel schließt die Hausder uff,
awer pletzlich is er gar nimmi gut druff!?!
Er kreischt:"Haaalt, Stop!!!! Bleiben steh,
äner fun eich muss jetzt mit mer geh!!!"
Der reißt die Ache uff, als hät er a G`spenst g´seh,
weil im Hausgang hot a gigandischi Fledermaus geläh.
"Ich kann do net nei," kreischd de Muffel vor Schreck,
"äner fun eich muß rame des Ding do weg!!!"
Die hän `nen dann fer verrickt erklärt,
un sin ganz äfach weiter maschiert.
Ab ins Audo un nuff zum Bauer,
led sisch de Muffel uff die Lauer.
Abg´fange hot der des Aggi dann ach glei,
un schmeichelt sisch schnell bei ´re ei.
"Hoschd Du Angscht vore Fledermaus??
Nä,dann fahr isch Disch gern nach Haus!!!"
Uff em Weg do nunner,
verzählt de Muffel fun seim Kummer.
Die Judda hot der dann mol vor g´schickt,
weil irgendwas in seiner Hose zwickt.
`S Aggi guckt sisch die Sache a,
un glaabt kaum, was se do sah.
Sie denkt,der Muffel hot en Knall,
un zwar en große, uff jeden Fall.
Vor lache kuchelt die Aggi sisch,
un´s Muffelche gried die Gäsegischd.
Ganze fünf cm war die gigandisch Fledermaus groß,
wege dere sisch de Muffel macht in die Hos.
Gereddet war des Kerlche dann glei,
so dass, de Muffel kummt in sei Wohnung nei.
Isch fro misch jetzt, wem´s dreckischer ging,
em Muffel oder dem armer Ding??
Die Matzeberjer Kerweredd
Vor drei Woche war in Matzeberg Kerb,
un die war ganz schä derb.
Isch fro misch, wer denne die Rede schreibt,
weil der so gar net bei de Wohred bleibt.
Denne ehr Spione sin blind un daab,
des is des, was isch nämlich glaab.
Drum sa isch eich, wie´s wärglisch war,
un stell mol einische Sache klar:
Bei de Aggi wurd an Vadderdach g´feiert,
die hän dort de "Weltfrauedach" a g´leiert.
Un wie die Fraue halt so sinn,
mänen die, sie missden zum Kerweplatz hin.
Die wollden dort es Kerwekomitee besuche,
awer do de zu missen se sisch a Taxi buche.
Fr. Silvia K. kummt dann uff die Idee,
mit em Schubkarre wär des doch a ganz schä.
A kumme sin die siewwe ganz heiter,
un machen mit a paar Schorle weiter.
Dann erschd kummen die Susi un de Gernot ins Spiel,
mit dem se ganz elegant fum Bierkaschde fiel.
Irgendwann macht es Kerwekomitee dann ach Schluss,
un des war de Susi ehr´n Verdruß.
"Isch will jetzt noch was zum Esse habbe,
isch glaab, bei de Aggi kännt´s noch klabbe."
Jetzt kummt de Susi ehr Zerstörungswut,
weil se nix zum Esse finne dut.
In ehrer Gier geht a was zu Bruch,
dann kam der "Leonardo-Blumenvase"-Spruch.
"Isch kaaf der moje a nejes Blumeg´fäß,
des schwör isch der bei meim G´säß!"
Kaum hot se des g´sa,
war de nägschde Alptraum da.
Unser Susi will wisse,was uff de Gass noch is,
un hot noch dabber de Porzelangeischd runner g´schmiss.
Es Aggi bleibt ganz freundlich un nett,
sad zu de Susi:"Hoschd dann du gar kä Bett?"
So un nett anscherd war die ganz G´schicht,
un nett wie die Amateure hän zamme g´dicht.
Kann do nur noch äns de zu sa,
mer bieden de Matzeberjer Entwicklungshilfe a!!!!!!!!
Es Eigeschärrte
Es Eigeschärrte hot in Busch e langie Tradition,
drum verballern dort viele ach ihr Euro-Munition.
Dort wird viel gefresse un ach viel gesoffe,
un spädeschdens um 8 wird dann Häm geloffe.
Doch desjohr gab´s mol wieder 2 Helde,
über die derf un will ich ach net so schelde.
Doch die zwä, die sin seit nlangem jedem bekannt,
de repariert Auto´s un de anner massiert die Leit im Land.
Jawohl ich mähn de Jutta ihrn Michel,
un de Günni, die ald Zichel!
Die zwä henn sich´s emol wieder gut gehe gelosse,
un henn sich am Sauheisje die Lichter ausgeschosse.
Um die Elfe hennse sich noch was eigeschärrt,
doch des Fläsch war zu lang drin, drum isses eigeschnärrt!
Dodruff hie mähnt de Michel: "Loss uns schnell Häm zu mir hinke,
um dort du mer ach noch astennisch ähner trinke!"
Gesagt getan, in de Dorfstroß akumme,
mit viel Radau, Lärm un e bisje gewumme,
wecken die zwä zuerschd die Hunde un dann die Kinner,
un kerz druff erscheint es Jutta´che mit nem große Gewimmer!
"Sinner noch glohr, sinner noch bei Sinne?
Ich glab ich dreh durch, ich fang bald ach zu spinne!
Ihr henn glab ich nix besseres in eierm Köppche,
als wieder nei, mit dem egliche Schöppche!?"
"Jutta beruhischd dich!" ruft de Günni entsetzt,
"Du bischd jo schlimmer, als mei goldischie Hex!"
Die Jutta besinnt sich un setzt sich an de Disch,
"Ens is sicher, der Schorle is jetzt erschd emol fer mich!"
Kaum am Schorle getrunke, sieht´se die nächschd Blamage,
de Günni massiert die Nele am Arsch.
Weil der gemerkt hot, das die Hüft is verspannt,
hot der dem Hund sei Massagefinger neigerammt!
Doch des war noch net alles, was der an dem owend hot getriebe,
als nächschdes dud er bei Ackermann´s die Möbel verricke.
Un dodebei singt der de Nele e Stänndche,
de Hund macht nebe ihm eifrisch es Männche!
Doch jetzt is Schluß selbschd de Michel is mied,
de Günni singt zum Abschied noch e Lied.
"Günni geh jetzt Häm un loss es Auto stehe,
in dem Zustand, kannschde net emol mehr gehe".
Am nächschde Dah geht die Jutta in die Praxis,
sieht de Günni un ruft laut :"Ich pack´s net!
Was is dann los, was issen bassiert?"
"Mich hot heit Nacht noch die Trepp massiert!"
Jetzt steht er do, de Kopp ganz blau un dick,
un versucht mit viel Redd un Geschick,
sich rauszuredde aus seim Schlamassel,
un wird dodebei so groß wie e Assel!
Dodruff hie fallt mir nur noch ens ei:
Wer soviel feiert, mit Bier, Schnaps un Wie,
der hot´s efach net annerschder verdient,
un wird beim nächschde Feschd wieder mit de Gummibänder feschd geschnallt!
Uff die zwä, die Jutta un die Nele,
muß ich jetzt mei Kehl emol ähle.
Proschd
Em Katsche sein Geburtsdach
Un zum Schluß wär do noch zu sa,
dass des Katsche fuffzisch war.
Die Mäd hän sisch einisches eifalle losse,
do sin beim Katsche ach Träne g´flosse.
Es Six-Päck hot g´discht un g´reimt,
dass die A´zeig a pinktlich in de Zeidung erscheint.
Die Karin hot des fünf mol g´lese,
un mänt, des wär´s jetzt g´wese.
Fer um siewwe wurd g´laade,
weil de Gäscht an de Knie hängt de Maage.
Awwer bevor des Katsche es Buffet eröffne kann,
war erschd noch was anneres dran.
Die Ache verbunn un ab nauss in de Hof,
do stand a Surprice, riesen groß.
Ehr´n greschde Wunsch war, e mol uff em Gaul zu sitzte,
un mit dem dursch de Wind zu flitzte.
Bis des Katsche drowe war,
wußt der Gaul net wie ihm g´schah.
Wie a klenes Kind hot se sisch g´freht,
un a paar Runde dursch de Schulhof g´dreht.
Es folgde e Highlight noch em anner,
unser Katsche fand:"Des is en Hammer!!"
Die Party war wärklisch gelunge,
un mer hän bis meuns um viere g´sunge.
Mer winschen der noch mol alles Gude,
drum du isch a mein Bescher flude.
Zum seschzigschde häns die Mäd dann awwer schwer,
dann muß nämlisch a riese Kamel do her.
De Umweltbahnhof un sei Tücke
In Grünstadt gebt´s jetzt seit 2 Johr,
en Umweltbahnhof, des is glohr.
Doch der Bahnhof hot e paar Tücke,
z.B. die Eibahnstroß Richtung Stadtmitt.
Unser Katche war gewesse am Bahnhof,
un hot dort gelöst Tickets noh Düsseldorf.
Als se wieder rauskummt sieht´se die Grüne dort warten,
die glei druff Richtung Stadtmitt abfahren.
Also unser Katsche verkehrt rum in die Eibahnstroß nei,
was die kennen, des kann ich ach, was fallt denne ei.
Doch die Ampel zeigt dann 5 Minute immer es gleiche Zeiche,
ich hab jetzt lang genug gewart, des muß jetzt reiche.
Jetzt ballert se de Gang nei, durchgedrickt wird es Gas,
de Motor heilt uff, uffem Seitenstreife verbrennt es Gras.
Die Räder drehn durch, die Kupplung losst se kumme,
rechts rum Richtung Schwimmbad, jetzt wird erschd emol geschwumme!
Selbschd de Schummi het bei dem Start verlore,
die Hettrumer wern froh, du dedschd diesjohr aschiebe die Lore,
doch 2 die des gesieh henn, dun sich net frehe,
es sin die Grüne, die Abzocker-Grähe!
Mit Blaulicht, oh Protz, fahrnse hinner ihr her,
es Karin denkt sich, hoffentlich is nix bassiert so schwer.
Dann schaltense ach noch die Sirene a,
es Karin denkt, nur noch schnell rechts ra.
Doch die Grienweiße überholense net,
sondern stellen ihr Gefährt hinner de Kadett.
Dann steigense aus un rennen druff los,
Hoffentlich lossense de Revolver stecke bloß.
Am Auto akumme sahnse dann Führerschei un Fahrzeugkontrolle,
es Karin denkt nur, was sinnen des fer 2 Olle?!
De ähne froht dann fer de Grund zum ahalte,
es Karin saht nur: "ich glab des issen Kalte!"
Dodruffhie erklärt ihr der ähnte Sheriff, ganz klar,
"sie sin zuerschd falsch rum in die Eibahnstroß gefahr,
un denoh ganz Schumi-Like,
über die rot Ampel gegeigt!"
"Lieber Officer, du bischd doch ganz glohr,
ich bin nur bei grün gefahr, des is wohr."
"OK" sagt de Herr im grüne Gewandt, garnet bläd,
sie kummen aussem Kläfrankreich, irgendwie dunse mer läd!"
Mit ihrm ganze Scharm un ihrer Weiblichkeit,
springste den Polizist an de Hals un schreit:
"Ich hab´s gewisst, sie henn e gudes Herz fer mich,
drum geb´s jetzt ach noch e Kissje fer dich."
Durch die Aktion hotse es Uheil abgewendt,
un trotzdem wieder a halb Stunn fer nix verschwendt.
Aber Hauptsach is, sie hot noch ihrn Lappe,
setztse sich ins Auto un braust weg mit gliehende Schlappe.
Mei Liebie Karin, ich bedank mich ganz herzlich,
dich ohne Auto zu sieh, wär fer mich ganz schmerzlich,
doch hättense ach noch uff dich geschosse,
hätt ich dich jetzt net mittem Schluck begosse!
De Schluß
So des war´s jetzt, die Redd is vorbei,
ich hehr jetzt uff, sag leise good bye.
Ich hoff eich hots gefalle un henn kräfdisch gelacht,
Mir do hobbe hots richdisch Spaß gemacht
An die Buscher Buwe will ich ens los werre,
halten de Kopp hoch un vielleicht ach eiern Derre.
Un an die Mädcher, die so goldisch un lieb sin,
will ich nur sah, das ich glicklich vergebbe bin!
Dud im kummende Johr net mit solche Peinlichkeite spare,
stellen viel a, mer werns schun erfahre.
Die Kerweredd kennt ihr wie immer kaafe,
bei denne im HKK-Hemd, die do rum laafe.
Aber zum Schluß will ich noch was sah, des liegt mer uffem Herze,
ihr Matzeberjer, hehrn uff, mit denne geklaute Scherze.
Denn des gehehrt sich net, un macht ach kän Spaß,
stellen doch selbschd mol was a, un gebben mol Gas,
Sunschd sitzen ihr irgendwann ohne Kerweredd do,
un des wär en Verlust, des wär dann net glohr.
Ihr hehrns an meiner Stimm, die is fett am absterbe,
drum wünsch ich eich noch viel Spaß uff unser Kerbe
Forzel reiß de Flasch uff, un schenk mir ener ei,
ich will heit owend richdisch besoffe sei!
Proschd